我知我係好耐無蒲頭嘅，各位親愛嘅讀者唔好嬲豬住。
自3月初返港探阿媽後我就滯留在港，同大家一齊坐定定響度，留港抗疫。雖然無得飛，但係在港期間，我竟然又返起工來！！！同時，有留意我IG嘅朋友，應該知道我月初返嚟時包辦屋企人三餐到後來兼顧埋包點部（係嘞，自己捉蟲入XX嘞）我無論返工定返屋企，都係被食物包圍著！我同食，真係關係好鬼密切！
咁我蒲頭係為乜事呢？就係因為響云云眾多嘅挑戰下，我被 饒雙廚房 同樣愛煮又愛寫嘅山羊女主理人tag了，分享一個食譜， 同時支持由 One Bite Social X JupYeah 執嘢 推出嘅「壹屋兩餐」計劃，希望透過新嘅社區食物互助模式，以少額捐款支持受疫情影響的食肆與家庭，為有需要幫助嘅街坊，提供健康安心的選擇。有意思的事，立即回應之餘，當然亦想廣傳，希望我親愛的讀者都可以知道這個美好的企劃！～
－－－－－－－－－－－－－－－
最撫慰我心靈的家常菜，一定係我阿媽嘅豉油雞。
好似話每個人都有自己的家傳豉油雞食譜，我這個食譜曾經都響味道圖書館分享過，不過好嘢唔怕講多次。小時候生日也好，大時大節也好，甚至後來每次出Trip回家吃飯時，媽媽都愛做這道菜給我。因為只要那一碗走地雞熬出來的豉油汁，我真係可以食多兩碗飯！我成家人成日都笑我話，豉油汁先係主角，隻雞係陪襯。
何媽媽豉油雞
材料：
新鮮雞 1隻 （約2斤半重）
蔥 2束
薑 30g
片糖 半塊
白蘭地 50ml （也可使用花雕或其他廚酒）
粗鹽 適量
生抽
老抽
水
做法：
1 將雞隻洗淨、抹乾；蔥切成兩段（方便塞入雞隻內）；薑刨成茸；片糖，破成小塊，備用。
2 預備一個碗狀大容器，將先用粗鹽於雞腔及雞皮外擦均勻，醃約5分鐘後，以生水沖洗一下，抹乾；然後從薑茸揸出薑汁，擦勻雞皮，再將薑茸擦於雞腔內（薑茸可留於雞腔內）。接著將白蘭地塗抹在雞皮上，跟住淋上老抽及生抽，將蔥也塞於雞腔內，靜置醃雞隻約20-30分鐘。
3 開油鑊，略煎兩邊雞脾，然後是雞胸；接著將醃汁、片糖倒入鑊內，加水，上蓋，中火煮20分鐘，時間到熄火但繼續燜焗20-30分鐘。
4 將豉油雞撈出，再中小火收汁；另一邊廂斬雞，汁煮至濃稠便可熄火（如汁料太稀，可另加入生抽、糖、粟粉的芡水使之變濃稠），即成。
－－－－－－－－－－－－－－－
我響專頁呢邊唔Tag人嘞，指望各位愛下廚的朋友一齊支持下：）無壓力，素食/肉食都好，可以分享食譜就分享食譜，可以隨緣樂助就隨緣樂助，可以Share Posts俾多啲人認識這個計劃都好。話俾你哋身邊嘅朋友仔知道啦！
.
抗疫留家，煮多咗飯，覺唔覺有住家飯食都幾好？但你想唔想像到，有人抗疫留家卻無足夠食材餵飽一家？又或因疫症而導致失業，生活變得足襟見肘，只能以劣食度日？個班人未必係你身邊，但定必係我地共同存在嘅圈子中。
.
呢個時勢，人人都面對challenge，但有能力行多步嘅，你會願意助人一齊跨過難關嗎？ 你每捐 $10 畀壹屋兩餐，就可以幫一個街坊食得飽。
.
接受挑戰，或者叫共同面對挑戰，Tag 3個有心人，齊齊上
https://www.collaction.hk/s/Foodhouse/
捐$10支持 #壹屋兩餐 #壹餐飯challenge #香港人 #互撐 #2020
Search